2021 წლის მარტში საქართველოში ფრანკოფონიის თვე აღინიშნება
ყოველწლიურად ფრანგული ენისა და ფრანკოფონიის დღესასწაული მრავალფეროვანი და საინტერესო პროგრამით აღინიშნება.
წელს ღონისძიებები საქართველოს განათლების, მეცნიერების, კულტურისა და სპორტის სამინისტროს, საქართველოს ფრანგული ინსტიტუტის, საფრანგეთის, შვეიცარიის, კანადისა და ბელგიის საელჩოების მხარდაჭერითა და საქართველოს სკოლებთან და უნივერსიტეტებთან თანამშრომლობით გაიმართება.
ფრანკოფონია 2021-ის ფარგლებში დაგეგმილ ღონისძიებების შესახებ განათლების, მეცნიერების, კულტურისა და სპორტის მინისტრის მოადგილე ნუნუ მიცკევიჩმა, საფრანგეთის ელჩმა საქართველოში დიეგო კოლასმა, შვეიცარიის ელჩმა საქართველოში პატრიკ ფრანცენმა და საქართველოს ფრანგული ინსტიტუტის დირექტორმა პიერ კლუემ სამინისტროში გამართულ პრესკონფერენციაზე ისაუბრეს.
კორონავირუსის გავრცელების პრევენციის მიზნით, ფრანკოფონიის ფარგლებში დაგეგმილი ღონისძიებები ძირითადად ონლაინ ფორმატში ჩატარდება. წელს საქართველოში ფრანკოფონიის თვის ოფიციალური სლოგანია: „ფრანგული ენა - ენა, რომელიც გვაახლოებს“. ამავე თემაზე დაგეგმილია ონლაინ კონფერენციის ჩატარება, კამპუს ფრანსის ეგიდით გაიმართება განათლების გამოფენა „აირჩიე სწავლა საფრანგეთში“, მოეწყობა ფრანგულენოვანი ფილმების ჩვენებები, გაიცემა გერონტი ქიქოძის სახელობის ლიტერატურული პრემია ფრანგულენოვანი რომანის საუკეთესო ქართული თარგმანისთვის, შედგება ქართულ ენაზე ნათარგმნი ფრანგულენოვანი ლიტერატურული ნაწარმოებების პრეზენტაცია და სხვა. ფრანკოფონია 2021-ის ფარგლებში, ტრადიციულად, გაიმართება კონკურსები მოსწავლეებისთვისა და სტუდენტებისთვის. გამარჯვებულებს სპეციალური პრიზები გადაეცემა.
ღონისძიებებს ქუთაისი, ბათუმი და საგარეჯო (პატარძეული) უმასპინძლებს.
ფრანგული ენისა და ფრანკოფონიის დღესასწაული მთელ მსოფლიოში, ტრადიციულად, ყოველი წლის 20 მარტს აღინიშნება. მთელი თვის განმავლობაში იმართება კულტურული და საგანმანათლებლო ღონისძიებები ფრანგულ ენაზე ან ფრანგულ ენასთან დაკავშირებით. საქართველო ფრანკოფონიის საერთაშორისო ორგანიზაციაში 2004 წლიდან არის გაწევრიანებული დამკვირვებელი წევრის სტატუსით. ხოლო ფრანკოფონიის საუნივერსიტეტო სააგენტოში ჩართულია ექვსი ქართული უნივერსიტეტი.
ფრანკოფონია 2021-ის ფარგლებში დაგეგმილი ღონისძიებების სრული ჩამონათვალი შეგიძლიათ იხილოთ ბმულზე: https://institutfrancais.ge
