ზოგადი განათლების განვითარების ხელშეწყობის მიზნით სამინისტრო გუდავაძე-პატარკაციშვილის ფონდთან ითანამშრომლებს
საქართველოს განათლებისა და მეცნიერების სამინისტროსა და გუდავაძე-პატარკაციშვილის ფონდს შორის, ზოგადი განათლების განვითარების ხელშეწყობის მიზნით, ურთიერთთანამშრომლობის მემორანდუმი გაფორმდა.
მემორანდუმს ხელი საქართველოს განათლებისა და მეცნიერების მინისტრის პირველმა მოადგილე ეკატერინე დგებუაძემ და გუდავაძე-პატარკაციშვილის ფონდის დირექტორმა ზურაბ კერვალიშვილმა მოაწერეს.
ახლად გაფორმებული მემორანდუმი ზოგადი განათლების მიმართულებით სხვადასხვა ასპექტით თანამშრომლობას ითვალისწინებს, მათ შორის, სკოლებში ახალი ეროვნული სასწავლო გეგმის დანერგვის პროცესის ხელშეწყობას, ციფრული სასწავლო რესურსებისა და პლატფორმების განვითარებას, მშობლების, მასწავლებლებისა და დირექტორებისთვის მეთოდოლოგიური გზამკვლევების შემუშავებასა და სკოლის მიღმა დარჩენილი მოსწავლეების სკოლაში დაბრუნების პროგრამის მხარდაჭერას.
ურთიერთთანამშრომლობის ფარგლებში მხარეები არაქართულენოვან სკოლებში ქართულის, როგორც მეორე ენის სწავლების გაუმჯობესებისთვის ერთობლივ პროგრამებსაც განახორციელებენ.
გუდავაძე-პატარკაციშვილის ფონდი 2017 წელს შეიქმნა და მისი მისიაა ხელი შეუწყოს ქვეყანაში განათლების სისტემის განვითარებას. იგი მიზნად ისახავს განათლების საერთო ხარისხის ამაღლებას, განათლების სტანდარტების გაუმჯობესებასა და განათლებაზე ხელმისაწვდომობის გაზრდას. ბოლო 3 წლის განმავლობაში ფონდის მიერ დაფინანსდა 20-ზე მეტი საგანმანათლებლო პროექტი, ხოლო განათლების სექტორში ფინანსური ინვესტიცია აღემატება 2 მილიონ ლარს.
